Татар халык көе
Гөлшат Зәйнашева сүзләре

Зөһрә йолдыз — таң йолдызы,
Таң беленгәч тә сүнер.
Кунак булып, кына, дуслар,
Килә икән яшь гомер.

Идел буен иңләп-буйлап,
Икәүләп йөрмәгәнбез.
Кунак кына яшь гомернең
Кадерен белмәгәнбез.

Челтер-челтер агып китәр,
Таш ташлама чишмәгә.
Яшь гомерем кире кайтса,
Белер идем нишләргә.

Яшьлектә үткән юлларга
Борылып карыйм һаман.
Адаштырса да яшьлегем,
Үкенмәс идем сыман.