Фирзәр Мортазин көе
Салисә Гәрәева сүзләре

Сукмаклар чуалган, адреслар югалган,
Эзләргә үләннәр шытканнар.
Тик ялгыз йөрәкләр якын дус кирәккә
Бер-берсен эзләргә чыкканнар.

Эндәшәм, зарыгам:
Кайда син, тиң ярым?
Сукмаклар чуалган, адреслар югалган,
Тик беләм дөньяда син барын.

Язмышлар сулыга, ятларга юлыга,
Үкенеч яндыра бәгырьне.
Сукмаклар чуалган, адреслар югалган,
Йөрәккә бары син кадерле.

Ягымлым, хәбәр ит:
Кайда син, кай якта?
Сукмаклар чуалган, адреслар югалган,
Тик йөрәк мәхәббәт сагында!