Илгиз Закиров көе
Әнгам Атнабаев сүзләре

Танып буе карлыган,
Өзмим — сиңа калдырам,
Килгәнеңне көтә-көтә,
Күзләремне талдырам.

Танып буе әрәмә,
Керсәм — башым әйләнә,
Абау, бәгърем, чәчкәйләрем
Чәчләреңә бәйләнә.

Танып буе камышлы,
Камышлары сагышлы,
Ишеттеңме «яратам» дип
Пышылдаган тавышны?!

Танып буе болынлы,
Болынында булдыңмы?
Болыннарда адашырбыз, —
Бир, кадерлем, кулыңны!

Танып буе бөрлегән,
Өзеп сиңа бир дигән,
Өзелеп сөйгән ярың өчен
Утка-суга кер дигән.

Танып буе әрәмә,
Керсәм — башым әйләнә,
Абау, бәгърем, чәчкәйләрем
Чәчләреңә бәйләнә.