Счетчики

Унике батыр турында баллада

Рөстәм Яхин көе
Нури Арсланов сүзләре

Таш утрау шикелле бу төрмә,
Таш койма әйләнә-тирәсе.
Белделәр бу ташлар мәйданга
Бүген дә корбаннар киләсен...
Дарларга унике батырның
Ашуын бу ташлар күрделәр,
Таң калып тетрәде диварлар;
Батырлар елмаеп үлделәр,
Татарлар елмаеп үлделәр...

Еракта, Идел-йорт җирендә
Унике батырның иле бар.
Кайтмаслар тик илгә егетләр:
Каршыда таш койма, шомлы дар.
Җәйге таң. Зәп-зәңгәр күк йөзе...
«Яшәргә иде!..» — ди күңелләр.
Тик шәфкать сорамый дошманнан,
Батырлар елмаеп үлделәр,
Татарлар елмаеп үлделәр.

Йодрыктай йөрәккә никадәр
Кайгылар, газаплар сыялар;
Сыймады батырлар йөрәге —
Чатнады таш пулат коймалар.
Хисләре, буйсынмый богауга,
Киң-иркен күкләргә менделәр
Һәм үлмәс җыр булып калдылар! —
Мусалар елмаеп үлделәр,—
Батырлар елмаеп үлделәр.

Страниц: 1
Источник: http://erlar.ru | Опубликовано: 04.03.10 | Просмотров: 3389 | [ + ]   [ - ]   |


© 2021 Все права защищены www.tatarlarga.ru
Разработка www.hafizof.ru
При полном или частичном использовании материалов, активная ссылка на www.tatarlarga.ru обязательна!